قصيدة ياخيل

بسايلك يا خيل .. شيرجعك خالي
حرمة و يتامى و ليل .. ما ترحم بحالي

وينه الولي .. و باﮔـي هلي
شلرجعك خالي ..

يا خيل .. يا شاعب ﮔـللوب النساء .. عالي التصهال
يا خيل .. فتني مجيك للخيم .. من غير خيال
يا خيل .. تدري بخيمنا الي بـﮕت .. بس نسوة و أطفال
يا خيل .. هذا الي منك والله لا .. ما مر على البال

يوم السمعنا الحمحمة .. بالونة ونينا
ﮔـلنا رجع حامي الحمى .. ليه والله حنينا
من بينت بس بالدماء .. ضاعت أمانينا
صوت الدمع هز السما .. سور الحرم وينه

من ايدي أخويه راح .. يا ضيعة آمالي
و ظليت أدﮒ الراح .. و أتأمل عيالي

ظهري انكسر .. آه يا مهر
شلرجعك خالي ..
*** *** ***

بسايلك يا خيل .. شيرجعك خالي
حرمة و يتامى و ليل .. ما ترحم بحالي

وينه الولي .. و باﮔـي هلي
شلرجعك خالي ..

رجعه .. من غير أبو سكنه ألف .. لا حيها رجعه
رجعه .. إﮔـصد الحومة و الولي .. للخيمة رجعه
رجعه .. استرجعت لله الوكيل .. و هاي رجعه
رجعه .. نرجع لطيبة و انته مو .. ويانا يَحسين

خذني رجوعك يا مهر .. عينك دمع سايل
و عنانك يخط الأرض .. بيك السرج مايل
اشهد وﮔـع ﮔـللبي الك .. ﮔـللبي وجع شايل
وين الي ﭼـان بصهوته .. الصايل الجايل

كل العشيرة تروح .. غالي بعد غالي
ﮔـلت بدمع مسفوح .. هذا الا يبـﮕـى لي

و تالي ترد .. وحدك فرد
شلرجعك خالي ..
*** *** ***

بسايلك يا خيل .. شيرجعك خالي
حرمة و يتامى و ليل .. ما ترحم بحالي

وينه الولي .. و باﮔـي هلي
شلرجعك خالي ..

فتني .. صوتك خطف لوني و شلع .. ﮔـلبي وفتني
فتني .. ﭼنها وفاتي برجعتك .. خالي وفتني
فتني .. وفيت أنا و أيامي كلها .. ما وفتني
فتني .. بعد الولي أﮔـضي حياتي .. بصبر من وين

دلني يا مهر لمصرعة .. باداوي جروحه
بلكت أوصله يا مهر .. ما فارﮔـت روحه
ﭼني أحس بنبرته .. و بونته و نوحه
تدري العقيلة بالخيم .. عالوالي مذبوحه

هد الزمن الأضلاع .. و غيره عمد ما لي
و صرت أدفع الأوجاع .. بيميني و شمالي

و ﮔـللبي انطبر .. رد الخبر
شلرجعك خالي ..
*** *** ***

بسايلك يا خيل .. شيرجعك خالي
حرمة و يتامى و ليل .. ما ترحم بحالي

وينه الولي .. و باﮔـي هلي
شلرجعك خالي ..

والله .. منـﭻ يا ريحانة علي .. مَـﮕدر على اللوم
و آنا .. ما مر عليَه بكل حياتي .. مثل هاليوم
ويلي .. عالي تدوسه الأعوجيه .. و ما قبل سوم
ودي .. لو عندي ﭼف أحمل حسامه .. و أفني هالـﮕوم

ترى أخضب حسرتي .. من نازف وريده
ترى عناني أجعله .. يتدلى في ايده
كلما له ظهري خادمك .. بس ﮔـلي شتريده
انته و أنا و هاي الحرب .. بالعسكر نبيده

شده بطرف العنان .. من هالنحب عالي
و هالمنجدل عطشان .. بالغبرة دلالي

ودني اله .. خلني أحمله
شلرجعك خالي ..
*** *** ***

بسايلك يا خيل .. شيرجعك خالي
حرمة و يتامى و ليل .. ما ترحم بحالي

وينه الولي .. و باﮔـي هلي
شلرجعك خالي ..

ما شاء الله شعر جميل يسلموووو

فارس الظلام
مرورك الاجمل الله يسلمك
مشكور على الرد

فارس الظلام
مرورك الاجمل الله يسلمك
مشكور على الرد